“Facebook”da səhifəsi olan 11 yaşlı qızın atası şəbəkəni məhkəməyə verib
Böyük Britaniyada çıxan “The Daily Mail” gündəlik qəzeti yazır ki, 11 yaşlı bir qızın atası “Facebook” sosial şəbəkəsini məhkəməyə verib. Novator.az-ın məlumatına görə, adı açıqlanmayan şəxs şəbəkəni uşaqların həyatını təhlükəyə altında qoymaqda ittiham edir.
“Facebook”dan kompensasiya istəyən ata iddia edir ki, sosial şəbəkə istifadəçilərinin yaş həddini yoxlamaq iqtidarında deyil və onun “Facebook” da səhifə açan 11 yaşlı qızı təhlükə altıdadır. Qızın şəbəkədə öz şəklini, ünvanını və təhsil aldığı məktəbin adını yerləşdirdiyini vurğulayan ata düşünür ki, övladı cinsi hücuma məruz qala bilər. Atanın arqumentinə görə, portalda səhifə açmaq üçün yaş həddi 13 göstərilsə də, “Facebook” üzvlərin yaşını yoxlamır.
Şəbəkənin məsul şəxsləri məhkəmə iddiasından xəbər tutduqdan sonra 11 yaşlı qızın profilini “Facebook”dan çıxarsalar da, ata artıq zərər çəkdiyini bildirir. İddiaçının vəkili hesab edir ki, belə situasiyalardan sığortalanmaq üçün “Facebook” istifadəçilərin yaş həddini dəqiq yoxlayan sistem tətbiq etməlidir.
“Facebook” şəbəkəsinin rəhbərliyi ona yönəlmiş bu ittihamlara şərh verməyib.
