Ekspert: “Maliyyə amnistiyası elan olunmalıdır”
İqtisadçı ekspert Qubad İbadoğlu oktyabrın 12-də Nazirlər Kabinetinin prezidentin sədrliyi ilə keçirilən iclasını şərh edib.
Transparency.az-a danışan ekspert bildirib ki, iclasda büdcə vəsaitinin qənaətlə işlədilməsi və sahibkarlara təzyiqlər məsələsi diqqəti daha çox cəlb etdi: “Hər iki məsələ indiki situasiyada əhəmiyyətlidir. Hazırda hökumətin qarşısında duran başlıca vəzifələrdən biri daxildə əlavə maliyyə qaynaqlarının tapılması və xaricdən birbaşa investisiyaların cəlb edilməsi üçün əlverişli biznes mühitinin yaradılmasıdır. Çünki qənaət özlüyündə ictimai vəsaitlərin istifadəsində rasionallığı və səmərəliliyi artırsa da, bu, sonzuluğa qədər davam edə bilməz. Biznesin fəaliyyət imkanlarının genişləndirilməsi isə əlavə maliyyə qaynaqlarının təmini üçün çox vacibdir. Davos İqtisadi Forumu qlobal rəqabətlilik qabiliyyətinə görə Azərbaycanı 40-cı yerdə qərarlaşdırıb və ölkəmiz dünyanın 40 ən rəqabətli ölkəsi ilə bir qrupdadır. Bu halda xarici investisiyaların təşviqi vasitəsilə sahibkarlığın inkişafına yönəlmiş dövlət siyasəti dayanıqlı iqtisadi artımın təmin edilməsini şərtləndirə bilər.
İnvestorlar Azərbaycan qanunvericiliyinin, xüsusilə də vergi və gömrük rejiminin dəyişdirilməsindən qaynaqlanan təsirlərdən sığortalanmalı və onlara bununla bağlı bəzi təminatlar verilməlidir. Çünki son zamanlar vergi qanunvericiliyi qeyri-əlverişli şərtlərlə sərtləşdirilib. Nəticədə hökumət orqanlarının əsassız yoxlamalarına, haqsız cərimələrinə daha da yol açılıb, bir qrupun başqa bir qrupun mülkiyyətini qəsb etməsi güclənib, kiçik və orta sahibkarların bir sinif kimi sıradan çıxarılması təhlükəsi yaranıb”.
Qubad İbadoğlunun sözlərinə görə, hakimiyyət artıq Azərbaycanda post-neft dövrünün başlandığını etiraf edir: “Hakimiyyətin keçid dövrü üçün ilk addımlarından biri maliyyə amnistiyası olmalıdır. Ölkəyə neft gəlirlərinin sürətlə və iri həcmdə daxil olduğu son illərdə gizli iqtisadi fəaliyyət və əməliyyatlardan əldə olunan maliyyə resursları tam və ya qismən leqallaşdırılmalıdır. Xaricə aparılan kapitalın geri qaytarılması, getdikcə artan vergi borc öhdəliklərinin həlli üçün hazırkı şəraitdə maliyyə amnistiyasının elan olunması zərurətə çevrilib. Bu tədbir yeni iqtisadi situasiyada çətinliklərlə üzləşən biznes qurumlarına kömək edərdi. Həmçinin Azərbaycan iqtisadiyyatının dayanıqlı inkişafı üçün vacibliyi getdikcə artan investisiya qoyuluşlarına töhfə verərdi.
Azərbaycanda büdcə gəlirlərinin formalaşmasında, ölkəyə xarici sərmayələrin cəlb olunmasında müşahidə olunan çətinlikləri nəzərə alaraq hökumət bu istiqamətdə müzakirələrə başlamalı, ümumi vergi amnistiyası elan olunmalı, vergi ödəyicilərinə münasibətdə “təmiz səhifə”dən başlanmalıdır. Bunun üçün xüsusi proqram qəbul edilməlidir”.
