Tədqiqat: Sosial şəbəkələr təhsilə pis təsir göstərmir
Sosial şəbəkələrdən aktiv istifadədən fərqli olaraq videooyunlara aludəçilik orta məktəblərdə buraxılış imtahanlarının nəticələrini pisləşdirə bilər. Bunu Böyük Britaniyada keçirilən tədqiqatın nəticələri göstərib.
Nadir hallarda videooyun oynayan yeniyetmələrin təxminən 77 faizi 5 imtahanda “A”, “B” və ya “C” qiymət alıb. Gündə ən azı iki dəfə videooyun oynayanların yalnız 41 faizi 5 imtahanda uğurlu nəticə qazanıb.
Tədqiqatı Milli Uşaq Bürosu (National Children’s Bureau) Şimali İrlandiya məktəblərində keçirib. Məlumata görə, 10 şagirddən 4-ü buraxılış ilində internetdə 4 saat və ya daha çox vaxt keçirir. Bununla yanaşı, imtahanlarda ən yaxşı nəticəni kompüterdən hər gün iş üçün 3 saat istifadə edərək ev tapşırıqlarını hazırlayan şagirdlər göstərib.
Evdə internetə çıxış imkanı olmayan şagirdlər imtahanlara bu imkandan yararlana bilən həmkarlarından daha pis hazırlaşıb. Onların yalnız 29 faizi 5 imtahanda “C” qiymət alıb. Evdə “Wi-Fi” çıxışı olanların 68 faizi isə imtahanı uğurla verib.
Tədqiqatçıların qənaətinə görə, müəllimlər evə tapşırıq verən zaman daha çox hazırlaşmaq üçün fərdi kompüter və internetdən istifadəni tələb edən çalışmalara üstünlük verməlidirlər. Qeyd olunur ki, yeniyetmələr bəzən müasir texnologiyalarda özlərini “ekspert” hesab etsələr də, valideynlər və müəllimlərin vəzifəsi onlara düzgün “rəqəmli vərdişlər” formalaşdırmağa kömək etməkdən ibarətdir
Məlumatı Mincom.gov.az saytı “Vesti”yə istinadla yayıb.
