İsmayıllı gəncləri beynəlxalq müsabiqədə uğur qazanıb
Azərbaycanın gənc meşəçiləri Moskva və Suzdal şəhərlərində Gənclərin XII Beynəlxalq Meşə Müsabiqəsində iştirak ediblər.
Təhsil Nazirliyindən AZƏRTAC-a bildiriblər ki, Rusiya Federasiyası Ekologiya və Təbii Sərvətlər Nazirliyi Federal Meşə Təsərrüfatı Agentliyinin dəvəti və Azərbaycan Respublikası Təhsil Nazirliyi Respublika Ekoloji Tərbiyə və Təcrübəçilik Mərkəzinin təşkilatçılığı ilə müsabiqədə iştirak edən gənc meşəçilərin “Meşələri yanğından qoruyaq” adlı ekoloji layihəsi finala vəsiqə alıb.
Moskva şəhərində toplaşan finalçılar mübarizəni Suzdal şəhərində davam etdiriblər. Burada dünyanın 24 ölkəsindən 43 məktəbli və tələbə meşəçilik sahəsində biliklərini sınayıb.
Meşənin yanğın təhlükəsizliyinə dair təkliflərlə çıxış edən gənc meşəçilər dünya gənclərinə müraciət edərək bu sahədə birgə səy göstərməyin vacibliyini vurğulayıblar.
Azərbaycanlı məktəblilər müsabiqə zamanı keçirilən viktorina və yarışlarda fəal iştirak edərək mükafatlara layiq görülüblər.
Beynəlxalq müsabiqənin yekun tədbirində İsmayıllı rayonunun gənc meşəçiləri Anna Orlova və Timofey Prokofyev Rusiya Federasiyası Parlamentinin Təbii Ehtiyatlar və Ekologiya Komitəsinin fəxri fərmanına, Ekologiya və Təbii Sərvətlər Nazirliyi Meşə Təsərrüfatı Federal Agentliyinin təsis etdiyi xatirə medallarına və diplomlara, MDB Parlamentinin xüsusi mükafatlarına layiq görülüblər.
