BMT Baş katibinin Qızlar Günü müraciəti
Oktyabrın 11-i Beynəlxalq Qızlar Günüdür. Bununla əlaqədar BMT-nin Baş katib Pan Gi Mun gender bərabərsizliyinə, habelə gənc qadın və qızların zorakılığa məruz qalmalarına son qoymağa çağırıb.
AZƏRTAC BMT Xəbərlər Mərkəzinə istinadla xəbər verir ki, hər gün təxminən 14 min həddi buluğa çatmayan qız ərə verilir. Hamiləlik və doğuşla bağlı çətinliklər əvvəlki kimi 15-19 yaş arasında qızların ikinci əsas ölüm səbəbidir. Dünyada milyonlarla qız zorlanmanın və ya digər formada cinsi əlaqəyə məcbur edilmənin qurbanı olur.
BMT Baş katibinin Beynəlxalq Qızlar Günü münasibətilə müraciətində deyib: “İndi bizim vəzifəmiz Davamlı İnkişafın Məqsədlərinə nail olmaq üçün işə başlamaqdan və qızlara 2030-cu ilədək – onlar yetkinlik yaşına çatanadək layiq olduqları imkanların yaradılması barədə vədləri yerinə yetirməkdən ibarətdir”.
UNAIDS proqramının icraçı direktoru Mişel Sidibe vurğulayıb ki, gender zəminində zorlanma yeniyetmə qızlar və gənc qadınlar arasında İİV-ə yoluxma riskini yüksəldir. 2014-cü ildə təxminən 350 min qız və qadın İİV-ə yoluxub. Onların çoxu partnyoru tərəfindən zorlanmanın qurbanlarıdır.
Dünya ictimaiyyəti davamlı inkişafın yeni məqsədlərini qəbul edən yeni tarixi imkandan istifadə etməli, gənc qadınların və qızların imkanlarını müdafiə etməli, dəstəkləməli və genişləndirməlidir. Bu, onların rolunu yenidən dərk etməyə, QİÇS-ə qarşı mübarizə tədbirlərini möhkəmləndirməyə və 2030-cu ilədək QİÇS epidemiyasına son qoymağa imkan verəcək.
