Robot tapança tutmağı öyrəndi
ABŞ-ın Pensilvaniya ştatının Pitsburq şəhərində yerləşən Karneqi-Mellon Univeristetinin tədqiqatçıları neyron şəbəkələrinin köməyilə “Baxter” sənaye robotuna müxtəlif obyektləri müstəqil idarə etməyi öyrədiblər.
Novator.az xəbər verir ki, mütəxəssislər müxtəlif əşyaların (oyuncaq tapança, plastik qab, televizor pultu və s.) düzüldüyü masanı robotun qarşısına qoyanda “Baxter” əşyalardan birini seçərək onu ən münasib nöqtələrdən götürməyə çalışıb. “Baxter” xeyli (188 dəfə) cəhd göstərəndən sonra əşyanı götürdüyünə əmin olmaq üçün onu qaldırmaq qərarına gəlib. Robot əşyanı götürmək prosesinin uğurla yekunlaşdığını özündə qeyd etdikdən sonra obyekti masanın üstünə qoyub. Robot əl hərəkətlərini dəfələrlə təkrarlayıb. Təlimin birinci mərhələsi başa çatanda tədqiqatçılar robota yeni əşyalar verməklə prosesi təkrarlayıblar.
10 gün ərzində keçirilən təlim zamanı robotun əşyaları masadan qaldırması prosesinə ümumilikdə 700 saat sərf olunub. Təlim zamanı əşya “Baxter”in əlindən düşdükdə robot növbəti əşyaya keçib.
