Ermənilər nə yazırdılar?
İsmayıl Vəliyev sovet dövründə Azərbaycanda erməni dilində çıxmış qəzetlərdən materialları dərc etməyə çağırır
Jurnalist, publisist İsmayıl Vəliyev yeni təkliflə çıxış edib. O, Novator.az-a bildirib ki, sovet dövründə Azərbaycanda erməni dilində nəşr olunmuş qəzetlərin nüsxələrini arxivlərdən götürüb araşdırmaq və həmin qəzetlərdə getmiş bir sıra materialları yenidən çap etmək lazımdır.
İsmayıl Vəliyev təklifini belə əsaslandırıb: “Ermənilərin bizə qarşı irəli sürdüyü iddialardan biri odur ki, guya onlar Azərbaycanda sıxışdırılıblar və guya onları 1980-ci illərin sonunda bizimlə münaqişəyə qalxmağa sövq edən əsas səbəb də bu olub. Halbuki həmin dövrdə Azərbaycanda erməni dilində 10-dan çox qəzet nəşr olunub. Heç bir başqa milli azlığın bu qədər dövri nəşri olmayıb. Elə bunun özü də erməni təbliğatına qarşı bir ciddi arqumentdir. Daha ciddi arqumentlər isə həmin qəzetlərin səhifələrindədir. Ermənilər Azərbaycandakı yaşayışları haqda öz dillərində çıxan qəzetlərdə öz dilləriylə nə yazıblar, nə deyiblər? Onlar Azərbaycan xalqı, yaşadıqları mühit haqda nə fikirdə olublar? Azərbaycana münasibətləri, Azərbaycanda onlara münasibət haqda nə yazıblar? Bax, erməni dilində çıxmış qəzetlər bu suallara cavab verə bilər.
Həmin qəzetlərin nüsxələri bizim kitabxanalarda və arxivlərdə bu günə kimi saxlanır. Erməni dilini bilən mütəxəssislərimiz, ziyalılarımız o qəzetləri nəzərdən keçirməli və erməni uydurmalarını puça çıxaran materialları müxtəlif dillərə tərcümə edərək yaymalıdır. Bu materialları elə erməni dilində erməni ictimaiyyətinin özünə də çatdırmaq olar. Məsələn, Bakıdan erməni dilində teleproqramlar yayılır. Həmin proqramlarda sözügedən qəzetlərdən mütəmadi olaraq materiallar təqdim etmək olar. Qoy erməni cəmiyyəti yaddaşını təzələsin və uydurmaları öz arqumentləri qarşısında aciz qalsın. Yəni biz ermənilərin öz dilləriylə dediklərindən öz saxta təbliğatları əleyhinə istifadə etməliyik”.
İsmayıl Vəliyev qeyd edib ki, o, arxivləri, kitabxanaları gəzərək vaxtilə Azərbaycanda erməni dilində nəşr olunmuş qəzetlərdən bir neçəsinin fotosurətini çıxarıb: “Məqsədim ölkəmizdə erməni uydurmalarına qarşı təbliğat aparan qrupların, mütəxəssislərin diqqətini bu məsələyə yönəltməkdir. Bu qəzetlərdəki materiallardan təbliğat işində istifadə eləmək gərəkdir. Çünki bunlar ermənilərin öz dedikləridir, öz yazdıqlarıdır”.
İsmayıl Vəliyev bu mövzuda Karabach.cz portalında məqalə ilə çıxış etdiyini də bildirib.
