ATƏT-in iclasında Azərbaycanda qadın və uşaq hüquqlarının müdafiəsindən danışılıb
Azərbaycanın İnsan Hüquqları üzrə Müvəkkili Aparatının (ombudsman) rəhbəri Aydın Səfixanlı Varşava şəhərində ATƏT-in insan ölçüsü üzrə illik görüşündə iştirak edib.
Aparatın mətbuat xidmətindən AZƏRTAC-a bildiriblər ki, A.Səfixanlı tədbirin qadınlara və uşaqlara qarşı zorakılıq mövzularına həsr olunmuş 5-ci və işgəncələrin qarşısının alınması məsələlərinə dair 8-ci işçi iclaslarında məruzə ilə çıxış edib. O, Azərbaycanda insan hüquq və azadlıqlarının daha səmərəli müdafiəsi və təmini istiqamətində hüquqi islahatların uğurla aparıldığını söyləyib. Qadınlara və uşaqlara qarşı zorakılıq mövzusuna dair iclasda aparatın rəhbəri ölkəmizdə gender bərabərliyinin təmini, qadınların və uşaqların hüquqlarının müdafiəsi sahəsində həyata keçirilən islahatlar barədə məlumat verib, uşaqların mənafelərinin qorunması istiqamətində xeyli irəliləyişlərin olduğunu diqqətə çatdırıb.
A.Səfixanlı Ermənistanın Azərbaycana qarşı təcavüzü nəticəsində taleyi haqqında indiyədək heç bir məlumat olmayan 4000-dən çox əsir və girov, Ermənistan silahlı qüvvələri tərəfindən Kəlbəcərdə girov götürülərək işgəncələrə məruz qalan Dilqəm Əsgərov və Şahbaz Quliyev, ümumiyyətlə, erməni silahlı birləşmələrinin mülkü əhalini, xüsusən uşaqları qətlə yetirməsi kimi qeyri-insani əməlləri haqqında məlumat verib, beynəlxalq təşkilatları bu faktlara biganə qalmamağa çağırıb.
