Regionlarda gənclər arasında debatlar təşkil olunacaq
Vətəndaş Cəmiyyətində Debat İctimai Birliyinin (DVC İB) rayonlarda yerləşən regional debat mərkəzlərində idarə heyəti ilə görüşlər keçirilib.
DVC-dən AZƏRTAC-a bildiriblər ki, Lənkəran, Biləsuvar və Sabirabad rayonlarında keçirilən görüşlərdə strateji planlar nəzərdən keçirilib, yeni mövsüm üçün fəaliyyət planının tərtib olunması müzakirə edilib.
Görüşlər zamanı yeni mövsümdə təşkilat tərəfindən regionlarda silsilə debat tədbirlərinin keçiriləcəyi barədə məlumat verilib.
DVC-nin aparıcı və ən kütləvi proqramlarından biri olan “Milli Debat Proqramı” gənclərin maariflənməsi və intellektual gənclər şəbəkəsinin yaradılması məqsədi daşıyır. Proqram vasitəsilə gənclərə debat metodologiyası, sosial aktivlik və digər bilik, bacarıq və dəyərlər aşılanılır. Proqram respublikanın 45 rayonunu və bütün böyük şəhərləri əhatə etməklə, 11 regional mərkəz və nümayəndəliyi özündə birləşdirir. Fəaliyyəti ərzində Regional Debat Mərkəzləri yerli gənclərə mütəmadi olaraq debat, natiqlik məharəti, idarəetmə, karyera, liderlik və digər mövzularda təlimlərin keçirilməsini təmin edib.
Bu günə qədər Milli Debat Proqramı çərçivəsində həyata keçirilən tədbirlərdə 40 mindən çox gənc iştirak edib.
