Snoudenin “Twitter”dəki ilk ismarışı 35 min adamı cəlb edib
ABŞ Mərkəzi Kəşfiyyat İdarəsinin sabiq əməkdaşı Edvard Snouden “Twitter” sosial şəbəkəsində hesab açıb.
Novator.az xəbər verir ki, Snouden mikrobloqundakı ilk ismarışında “Siz indi məni eşidirsinizmi?” yazıb. İsmarış yazılan kimi 35 min istifadəçinin diqqətini çəkib və Snoudenin səhifəsinə 250 min adam üzv olub.
Snouden ilk “tvit”ində “Bugünlərdə suyun aşkarlandığı Marsla sərhəddə pasportları yoxlayırlarmı?”sualını da verib.
Edvard Snouden 2013-cü ilin iyununda ABŞ xüsusi xidmət orqanlarının məxfi proqramlarından geniş miqyasda informasiyalar sızdırıb. O bildirib ki, ABŞ-ın kəşfiyyat orqanları nəhəng “Verizon” mobil operatorunun bütün zənglərinə giriş əldə edib. Bundan başqa o, PRİSM Milli Təhlükəsizlik Agentliyinin mühüm saytların elektron əlaqələrini izləməyə imkan verən məxfi proqramı haqda informasiyanı ortaya çıxarıb. Snoudenin açıqlamalarından sonra Amerika hökuməti hüquq müdafiəçilərinin və xarici dövlətlərin tənqidinə məruz qalıb.
Snouden 2013-cü ilin iyunun 23-dən Rusiya Federasiyasındadır. O, həmin ilin avqustunda Rusiyada müvəqqəti sığınacaq alıb. 2014-cü ildə Rusiyada ona üçillik müvəqqəti yaşayış təqdim olunub.
ABŞ hakimiyyəti dəfələrlə Rusiyadan Snoudeni təhvil verməyi istəyib, Moskva isə onun vətənində ölüm hökmü ilə qarşılaşa biləcəyini əsas gətirərək bundan imtina edib.
