Prezident Administrasiyası rəhbərinin müavini: “Avropa islam dininə borcludur”
Novator.az xəbər verir ki, Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov sentyabrın 22-də “Twitter” şəbəkəsində Avropa haqqında növbəti mülahizələrini bölüşüb. O yazıb: “Mən yaxşı bilirəm, məni izləyənlərin əksəriyyəti yüksək intellektli, hazırlıqlı və ciddi insanlardır. Yaşından asılı olmayaraq bu insanları dünyada gedən proseslər, proseslərin tarixi və onlara münasibət maraqlandırır. Buna görə də bəzi çox mühüm hesab etdiyim məqamlarla bağlı fikirlərimi bölüşürəm”.
Daha sonra Novruz Məmmədov bildirib: “İslam dininin yaranması və o dövrdən keçən bir neçə yüz ili əhatə edən hadisələri öyrəndikdən sonra qərara gəldim ki, Avropa öz Renessansı üçün islam dininə və bir neçə yüz il onun sayəsində bütün sahələrdə qazanılan nailiyyətlərə borcludur. Təəssüf ki, Avropada bu həqiqətlə bağlı susmağa üstünlük verirlər”.
Sentyabrın 15-də Novruz Məmmədov “Twitter”də yazmışdı: “Avropanın bir sıra dövlətləri hesab edirlər ki, bütün ölkələrin onların qarşısında öhdəlikləri var, amma özlərinin heç bir öhdəliyi yoxdur. Beynəlxalq aləmə çıxış resursları güclü olan dövlətlər prosesləri monopoliyaya alıblar. Onlar bu prosesləri maraqları çərçivəsində istədikləri formada, məzmunda və istiqamətdə yaymaqla, mövqe formalaşdırmaqla məşğuldurlar. Universal dəyərlərdən danışmaqdan yorulmayan Qərb və Avropada deyəsən heç bir dəyər qalmayıb”.
