Bakıda “nurçu”lara qarşı əməliyyat
Sentyabrın 19-da Bakının Yasamal rayonunda “nurçu” dini təriqətini təbliğ etdikləri üçün 85 nəfər saxlanılıb. Əməliyyatı Yasamal Rayon Polis İdarəsinin 29-cu polis bölməsinin və MTN-in Yasamal rayon şöbəsinin əməkdaşları həyata keçiriblər. “Nurçu”lar Mübariz Əsədovun X.Mustafayev küçəsindəki evində saxlanılıblar.
Daxili İşlər Nazirliyinin məlumatına görə, evə baxış zamanı 3000 ədəd yayılması və təbliği qanunla qadağan edilmiş dini ədəbiyyat aşkar edilərək götürülüb. Onlardan 2 nəfər barəsində İnzibati Xətalar Məcəlləsinin 300-cü, 5 nəfər barəsində isə 299.0.2-ci maddələri ilə protokol tərtib edildikdən sonra buraxılıblar.
