Qusarda leysan: 3 ev dağılıb
Sentyabrın 16-da axşam saatlarında Qusar rayonu ərazisində leysan yağış yağıb. Yağış bəzi fəsadlar yaradıb.
Fövqəladə Hallar Nazirliyindən AZƏRTAC-a bildiriblər ki, güclü yağış nəticəsində Qusar şəhəri, Çiləgir və Köhnə Xudat kəndlərində ümumilikdə 19 tikili qismən su altında qalıb, 3 ev dağılıb. Əraziyə Fövqəladə Hallar Nazirliyinin Şimal Regional Mərkəzi, Mülki Müdafiə Qoşunları və Qusar Rayon Dövlət Yanğından Mühafizə Hissəsinin qüvvə və vasitələri cəlb olunub. Dağıntılar altında qalan üç nəfər Şimal Regional Mərkəzinin əməkdaşları tərəfindən xilas edilib. Bir nəfər xəsarət alıb.
Hazırda nazirliyin əraziyə cəlb olunmuş qüvvələri tərəfindən suyun kənarlaşdırılması işləri davam etdirilir.
