Öldürülən jurnalistin atası: “Barışıq mümkün deyil”
“Cavid Hüseynovun ailəsi ilə barışıq mümkün deyil”. Bunu musavat.com-a açıqlamasında döyülərək öldürülən jurnalist Rasim Əliyevin atası Məmmədəli Əliyev deyib.
Məmmədəli Əliyev bildirib ki, “Qəbələ” futbol klubunun hazırda həbsdə olana kapitanı Cavid Hüseynovun ailə üzvləri onlarla barışmaq istəyib: “Cavid Hüseynovun ailəsindən birbaşa bizimlə danışan olmayıb. Amma Cəbrayıldan olan qohumlar, yaxınlar vasitəsilə bizə belə bir xəbər çatıb ki, barışmaq istəyirlər. Amma biz qəbul etməmişik. Barışıq mümkün deyil”.
Jurnalistin atası günahkarların cəzalandırılmasını tələb etdilkərini bildirib.
Həkimlərlə bağlı heç bir tədbir görülmədiyini deyən M.Əliyev həkimlərin işini araşdırmaq üçün Səhiyyə Nazirliyi tərəfindən komissiyanın yaradıldığını qeyd edib: “İşi araşdıran müstəntiq bizə bildirdi ki, baş prokuror Səhiyyə Nazirliyinə müraciət edib. Səhiyyə Nazirliyində xüsusi komissiya yaradılıb, həkimlər haqda rəy verilməlidir. Bundan sonra həkimlərin günahının olub-olmaması araşdırlacaq və tədbir görüləcək”.
Rasim Əliyevi avqustun 8-də bir qrup şəxs vəhşicəsinə döyüb, jurnalist bir gün sonra xəstəxanada vəfat edib.
Qətl hadisəsi ilə bağlı saxlanılan 6 nəfər arasında futbolçu Cavid Hüseynov da var.
