Kiber-təhlükəsizlik bir ildə dünyaya 445 milyard dollara başa gəlir
Kiber-risklərin artması bir ildə dünya iqtisadiyyatına 445 milyard dollara başa gəlir. “BatBlue” portalında dərc olunmuş sığorta hesabatına görə, bu məbləğin 108 milyardı ABŞ-ın payına düşür.
AZƏRTAC “İnterfaks” informasiya agentliyinə istinadla xəbər verir ki, kiber-casusluqla bağlı risklər və internet fəaliyyəti sahəsindəki cinayətlər biznesə daha çox ziyan vurmaqda davam edir. Hər keçən gün daha çox şirkət belə bir müdaxilənin nəticələri ilə üzləşir və bu tendensiya son 15 ildə xeyli dərəcədə artıb. Kibernet risklərinin qarşısının alınması üzrə xərclərin yarısını (200 milyard dollardan bir qədər çox) ABŞ, Çin, Almaniya və Yaponiya iqtisadiyyatları öz üzərilərində daşıyır.
Hazırda nəzərə çarpan ən böyük kiber-cinayətlər məlumatların oğurlanması və şəxsi həyatın toxunmazlığının pozulması hesab olunur.
Ekspertlərin fikrincə, yaxın illərdə intellektual mülkiyyətin qəsb edilməsi, kiber-dələduzluq və yüksək texnologiyalar sahəsində təxribatlar daha geniş vüsət alacaq.
