Hakim partiyanın namizəd vermədiyi dairələrdən kimlər deputatdır?
Hakim Yeni Azərbaycan Partiyası noyabrın 1-də keçiriləcək parlament seçkisinə 117 namizədlə qatılır. Hazırda 125 yerlik parlamentdə 66 mandatla təmsil olunan partiya onların 53-nü yenidən namizəd göstərib. 13 deputat YAP-ın siyahısından kənar qalıb.
YAP icra katibinin müavini, deputat Siyavuş Novruzov APA-ya açıqlamasında hakim partiyanın 8 seçki dairəsindən Milli Məclisə namizəd irəli sürməməsinə belə aydınlıq gətirib: “Həmin dairələrdən birində — Xankəndidə YAP-ın təşkilatı yoxdur. Digər 7 dairədə isə oradan namizədliklərini irəli sürmüş tanınmış şəxslərə, ziyalılara hörmət əlaməti olaraq alternativ namizəd vermək istəmədik”.
Hazırda 122 saylı Xankəndi seçki dairəsindən deputat Flora Qasımovadır. O bitərəfdir, 2005-ci ildən Milli Məclisin üzvüdür.
Transparency.az YAP-ın namizəd vermədiyi digər dairələrdən hazırda deputat olan şəxslərin siyahısını təqdim edir:
3 saylı Babək-Kəngərli seçki dairəsi — Səttar Möhbalıyev, Həmkarlar İttifaqları Konfederasiyasının sədri, bitərəf, 2000-ci ildən Milli Məclisin üzvü
7 saylı Ordubad-Culfa seçki dairəsi — Qüdrət Həsənquliyev, Bütöv Azərbaycan Xalq Cəbhəsi Partiyasının sədri, 2003-cü ildən Milli Məclisin üzvü
50 saylı Qobustan-Xızı-Sumqayıt seçki dairəsi — Zeynəb Xanlarova, müğənni, bitərəf, 1995-ci ildən Milli Məclisin üzvü
60 saylı Salyan-Neftçala seçki dairəsi — Fəzail Ağamalı, Ana Vətən Partiyasının sədri, 1996-cı ildən Milli Məclisin üzvü
66 saylı Biləsuvar seçki dairəsi: Xanhüseyn Kazımlı, Sosial Rifah Partiyasının sədri, 1999-cu ildən Milli Məclisin üzvü
93 saylı Bərdə şəhər seçki dairəsi: Zahid Oruc, bitərəf, 2000-ci ildən Milli Məclisin üzvü
116 saylı Qəbələ seçki dairəsi: Fəttah Heydərov, Azərbaycan Ağsaqqallar Şurasının sədri, bitərəf, 1995-ci ildən Milli Məclisin üzvü.
