Bakı rus turistləri cəlb edən dördüncü şəhərdir
Rusiyanın Travel.ru saytı bu ölkədən yaxın xaricə (MDB məkanına) gedən turistlərlə bağlı statistika açıqlayıb. Statistikaya əsasən, Bakı 2015-ci ildə rusların ən çox səfər etdiyi dördüncü şəhərdir.
MDB şəhərləri arasında birinci yeri Minsk, ikinci yeri Kiyev, üçüncü yeri Almatı tutur. Yerevan beşincidir.
Ən populyar ölkə isə Belarusdur. Bu il yaxın xaricə üz tutan rus turistlərin 37%-i Belarusu seçib. Ukrayna ikinci (22%), Qazaxıstan üçüncü (16%), Azərbaycan dördüncü (9%), Ermənistan beşinci (7%) pillədə dayanır.
Transparency.az xəbər verir ki, statistikaya görə, rus turistlər Bakıda otelin sutkasına orta hesabla 78 dollar xərcləyib. Yerevanda bu, 63 dollar başa gəlib.
Astanada mehmanxananın 1 sutkasına ruslar orta hesabla 115 dollar ödəyib. Bişkek isə bu baxımından MDB-də ən ucuz paytaxt şəhəridir (30 dollar).
Rus turistlərin bu il ən çox səfər etdiyi kurort zonaları arasında Azərbaycanın Nabran qəsəbəsi dördüncü yeri tutur.
