İnternet yavaş-yavaş televiziyanı “yeyir”
Media bazarı üzrə analitik və ekspert Mişel Natanson son məruzəsində televiziyaların hazırkı reytinqindən danışıb.
Novator.az xəbər verir ki, ekspert internetin televiziyanı yavaş-yavaş sıradan çıxardığını iddia edir. Natanson bildirir ki, televiziyaçılar əvvəllər öz reklam bazarlarının iflasa uğrayacağı haqda faciəvi proqnozlara gülürdülər. İndi isə onlar bu proqnozları real və təhlükəli saymağa başlayıblar. TV-lərin reytinqi və reklam gəlirləri azalır. İnsanlar mavi ekrana baxmaqdan vaz keçməyiblər, amma onların çoxu internetə qoşulmuş kompüter ekranına baxmağa üstünlük verir.
Ekspert 2020-ci ilədək televiziyada reklam gəlirlərinin daha 3% aşağı düşəcəyini proqnozlaşdırır.
Analitik 2017-ci ilə qədər “Google” və “Facebook” şirkətlərinin rəhbərlik etdiyi internet reklam bazarının televiziya reklam bazarını keçəcəyini yazır.
Natanson məruzəsində yaxın beş ildə internet reklamı həcminin hər il 12% artacağını və onların əksəriyyətinin sosial şəbəkələrdə və videoçarxlarda yerləşdiriləcəyini qeyd edir.
