Regionlarda qadın hüquqları ilə bağlı maarifləndirmə işləri
Ailə, Qadın və Uşaq Problemləri üzrə Dövlət Komitəsinin təşkilatçılığı, Almaniya Beynəlxalq Əməkdaşlıq Cəmiyyətinin dəstəyi ilə Mingəçevirdə qadın hüquqları mövzusunda seminar keçirilib.
AZƏRTAC xəbər verir ki, tədbirdə şəhərin idarə və təşkilatlarında, təhsil və səhiyyə ocaqlarında işləyən fəal qadınlar iştirak edib. Komitənin hüquqi təminat şöbəsinin müdir müavini Vəsilə Mövsümova çıxış edərək Azərbaycanda qadın hüquqları və gender bərabərliyi məsələləri barədə danışıb. O bildirib ki, bu layihəni həyata keçirməkdə məqsəd qadın hüquqları ilə bağlı bütün regionlarda maarifləndirmə işini daha geniş şəkildə təşkil etməkdir. ”Region qadınlarının sosial həyatda iştirakçılığını artırmaq üçün üçüncü ildir ki, bu layihə icra olunur. Biz ötən iki il ərzində 22 şəhər və rayonda layihə çərçivəsində tədbirlər həyata keçirmişik. Bu ilin sonunadək daha 9 bölgədə qadın hüquqları ilə bağlı seminarlar təşkil olunacaq” – deyə Vəsilə Mövsümova vurğulayıb.
Tədbirdə çıxış edənlər qadınların məişət zorakılığı ilə bağlı daha geniş şəkildə maarifləndirilməsinin vacibliyindən danışaraq qeyd ediblər ki, ölkəmizdə insan hüquqlarının təmin olunması, məişət zorakılığının qarşısının alınması üçün mühüm işlər görülür. Beynəlxalq araşdırmalar və statistik hesablamalar göstərir ki, Azərbaycanda məişət zorakılığı pik həddə deyil. Lakin, bununla bərabər, məişət zorakılığı bir problem kimi mövcud olaraq qalmaqdadır. Seminarda tədbir iştirakçılarının qadın hüquqları ilə bağlı sualları cavablandırılıb.
