Rusiya Təhlükəsizlik Şurasınının katibi: “Xarici servislər təhlükəlidir”
Rusiya Təhlükəsizlik Şurasınının katibi Nikolay Patruşev məmurların xidməti vəzifələrini yerinə yetirərkən xarici internet servislərindən yararlanmasını təhlükəli sayır.
Novator.az xəbər verir ki, Patruşev Rusiyanın Vladivostok şəhərində bugünlərdə keçirdiyi iclasda belə deyib. O bildirib ki, Xabarovskun dövlət orqanlarının əməkdaşları “Google”, “Yahoo”, “WhatsApp” kimi bir sıra xarici informasiya telekommunikasiya xidmətlərindən istifadə ediblər. O qeyd edib ki, xarici internet servislərindən istifadə Rusiyanın bütün məmurları üçün təhlükəlidir, xüsusən də Uzaq Şərqdə çalışanlar üçün: “Ölkənin bütün regionlarının rəhbərlərindən bu problemə diqqət yetirməyi və müvafiq tədbirlər görməyi xahiş edirəm”.
Nikolay Patruşevin sözlərinə görə, məmurların informasiya təhlükəsizliyi normalarına etinasızlığı dövlət və bələdiyyə məlumat sistemlərinin kifayət qədər müdafiə olunmamasına gətirib çıxarıb: “Rusiyanın dövlət orqanlarının əksəriyyətində informasiya müdafiəsi üzrə tədbirləri nəzərdə tutan təşkilati-inzibati aktlar formal xarakter daşıyır”.
