Televizor sizə baxa bilər
Təkcə kömpüterlərin və mobil telefonların yox, yeni televizorların da internetə çıxış imkanı var. Ona görə televizorların da kiber təhlükəsizliyi məsələsi ortaya çıxır.
Novator.az-ın məlumatına görə, Türkiyənin Yaşar Universitetinin kompüter mühəndisliyi fakültəsinin rəhbəri dosent Əhməd Koltuksuz vətəndaşlara xəbərdarlıq edərək bildirib ki, ağıllı cihazlardan ağılla istifadə etməyənlərin həyatı risk altındadır.
Əhməd Koltuksuz qeyd edib ki, kiber cinayətkarlar internetə qoşulmuş telefon və televizorların kamera və mikrofonunu ələ keçirib insanları izləyə bilərlər: “Onlar bunu elə eləyərlər ki, hətta ruhunuz da inciməz. Yəni kiber cinayətkarlar televizorların yaddaşına daxil olaraq kredit kartınızdakı, sosial şəbəkələrdəki fərdi məlumatlarınızı, elektron ünvanlarınızın parolunu oğurlaya bilərlər”.
Mobil telefonlar kimi, müasir televizorların da kiber hücumların hədəfi ola biləcəyini vurğulayan Əhməd Koltuksuz internetə televizorlardan qoşulanların get-gedə artdığını deyib: “İnsanlar kompüter və ya mobil telefondan edəcəkləri əməliyyatları televizorlardan da edə bilirlər.Televizorlardakı daxili və xarici kameralar vasitəsilə uzaqdakı yaxınlarını görə bilirlər. Unutmayın ki, həmin kamera və səs qəbuledicilərinə uzaqdan nəzarət etmək mümkündür. Siz televizora baxarkən, televizorunuz da sizi izləyə və dinləyə bilər. Televizora baxanda arzuolunmaz görüntülərinizi ertəsi gün video bloqlarında görə bilərsiz. Çox sadə tədbirlərlə bu problemi həll edə bilərsiniz”.
Əhməd Koltuksuz görüləcək tədbirləri sadalayıb: “Televizorun səsini alın, kamerasının da üstünü istifadə etmədiyiniz zaman örtün. Eləcə apteklərdə satılan balaca plastırı da kaçeranın üstünə yapışdıra bilərsiz. Tez-tez istifadə etdiyiniz fləşkartların, CD-lərin də təhlükəsizliyinə fikir verin. Təhlükəsizliyinə əmin olmadığınız qurğuları telefonunuza və ya televizorunuza yükləməyin, qoşmayın. Yükləmə həyata keçirəndə nələrə icazə verdiyinizə mütləq nəzarət edin. Əks halda öz razılığınızla səs və ya görüntünüzün qeydə alınmasına icazə vermiş olarsınız. Qeyri-rəsmi mənbələrdən heç nə yükləməyin”.
