Alimlər diabetin yeni müalicə üsulunu tapıblar
ABŞ-ın Boston şəhərində yerləşən “Vertex Pharmaceuticals” biotexnologiya şirkəti ağır formalı 1-ci tip diabetin yeni müalicə üsulunu hazırlayıb.
1-ci tip diabet mədəaltı vəzin insulin ifraz edən hüceyrələrinin məhv olması üzündən qanda şəkərin kəskin artımıdır. Belə xəstəliyə tutulanlar daim insulin qəbul etməyə möhtacdır.
Novator.az-ın məlumatına görə, “New England Journal of Medicine” yazır ki, amerikalı alimlər insanın kök hüceyrələrindən hazırlanmış mədəaltı vəz hüceyrələri elementlərinin bədənə yeridilməsi ilə insulin ifrazının bərpasına nail olublar. Kliniki tədqiqata, yəni hüceyrə terapiyasına cəlb olunmuş 12 xəstənin 10-nun bir il sonra insulin qəbulunu tam dayandırdığı bildirilir.
Kanadanın Toronto Universitetində cərrah Trevor Rayhmanın başçılığı ilə aparılmış tədqiqat göstərib ki, “Zimislecel” adı verilmiş hüceyrələr orqanizmə oturuşaraq özünü tənzimləyir.
Beynəlxalq Diabet Federasiyasının məlumatına görə, dünyada 9 adamdan biri şəkər xəstəliyindən əziyyət çəkir.
Mənbə: Sciencealert.com
