Avropadan yeni qərarlar gəlir
- 11 Noyabr 2021
- comments
- hikmet
- Posted in Dünyanın səsiXəbər
Avropa İnsan Hüquqları Məhkəməsi noyabrın 18-də Azərbaycan üzrə yeni qərarlar elan edəcək. Aihmaz.org-un məlumatına görə, Azərbaycan vətəndaşı Səyyarə Əhmədova məhkəməyə Avropa İnsan Hüquqları Konvensiyası ilə qorunan mülkiyyət və şəxsi həyata hörmət hüquqlarına müdaxilə iddiası ilə üz tutub. Şikayət onun evinin sökülməsi, kompensasiya ödənmədən qızı ilə birgə evdən çıxarılmasını nəzərdə tutan qərarla bağlıdır. Əhmədova bildirir ki, 2007-ci ildə Bakının Səbail rayonunda ev alıb. 3 il sonra yerli məhkəmələr Dövlət Neft Şirkətinin evin sökülməsi üzrə iddiasını təmin edib. Evin neft hasilatı üçün ayrılmış dövlət torpağında icazəsiz tikili olması ilə əsaslandırılan qərar hələ icra olunmayıb.
Türkiyə vətəndaşı Serpil Par və Yaponiya vətəndaşı Katsunori Hyodonun şikayətləri 2010 və 2011-ci illərdə Bakının beynəlxalq hava limanında saxlanmaları, bəyan edilməmiş pullarının gömrükdə götürülməsi ilə bağlıdır. Onlar pullarının qanunsuz müsadirə olunduğunu bildirir, mülkiyyət hüquqlarına müdaxilənin baş verdiyini iddia edirlər.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin yurisdiksiyasındadır.