2021-ci il girəndən Mərkəzi Bankın Dövlət Neft Fondu ilə birgə keçirdiyi valyuta hərraclarında 279,2 milyon ABŞ dolları məbləğində vəsait satılıb. Novator.az bildirir ki, 5 yanvar hərracında 66,4 milyon dollar, 7 yanvar hərracında 70,6 milyon dollar, 12 yanvar hərracında 142,2 milyon dollar sərf olunub.

Yanvarın 12-də rəsmi məlumat yayan Mərkəzi Bankın izahına görə, mətbuatda və sosial şəbəkələrdə manatın ucuzlaşacağı ilə bağlı əsassız iddialara yer verilməsi son valyuta hərracında tələbin nisbətən artmasına gətirib: “Manatın ucuzlaşacağı iddiaları əsassızdır. Hesab edirik ki, nağd valyuta ilə bağlı artan tələb müvəqqəti xarakter daşıyır və qısa zamanda səngiyəcək”.

Açıqlamada o da vurğulanır ki, bəzi internet səhifələrinin iddiasına rəğmən bankların qeyri-nağd ABŞ dolları satışlarında problem yoxdur: “Mərkəzi Bank həftədə iki dəfə – çərşənbə axşamı və cümə axşamı valyuta hərracı keçirir, bankların həm nağd, həm də qeyri-nağd valyuta üzrə tələbləri tam təmin edilir”.

2015-ci ilin devalvasiyaları nəticəsində dolların rəsmi məzənnəsi 0,7844 manatdan 1,5594 manata yüksəlib.

2016-cı ildə rəsmi qiymət 1,7707 manata çatıb.

2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən banklara 1,7 manata təklif olunur.

Dövlət Neft Fondu Mərkəzi Bankın 2016-2020-ci illərdə keçirdiyi valyuta hərraclarında 28,9 milyard ABŞ dolları məbləğində vəsait satıb. Manatı qorumağa 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard dollar sərf edilib.