Respublikaçı Alternativ Partiyasının xarici əlaqələr katibi Erkin Qədirli Qərb dairələrini qınayan açıqlama yayıb. Novator.az-ın məlumatına görə, Avropa Parlamentinin yanvarın 17-si Azərbaycandakı siyasi məhbuslarla bağlı qətnamə qəbul etdiyini xatırladan siyasətçi yazır ki, bu tip sənədlərin sayını itirib: “Bir yandan ölkəmizi unutmurlar, sanki dəyişikliklərə ümid edilər. O biri yandan da ölkəmizdə ancaq hökumətlə danışırlar. Qərbin siyasətçiləri və siyasi qurumları, eləcə də beynəlxalq dövlətlərarası təşkilatlar Azərbaycan müxalifətini siyasi danışıqlardan qıraqda tuturlar. Ölkəmiz üçün önəmli olan heç bir mövzuda müxalifətlə danışmırlar. Ancaq humanitar söhbətlər (insan haqları, həbslər və s.) edirlər.

Diplomatlarla və beynəlxalq qeyri-hökumət təşkilatları ilə görüşləri və söhbətləri saymıram. Onların məqsədi və təsiri başqadır.

Müxalifət, ya da müxalifətin özündə dəyişiklik olmasa, ölkəmizdə önəmli siyasi dəyişiklik olası deyil. Avropa Birliyi, Avropa Şurası və başqaları müxalifəti siyasi danışıqlardan uzaq tutmaqla onun sağlamlaşmasının və güclənməsinin qarşısını alırlar.

O gün də ATƏT-in Minsk qrupunun həmsədrləri deyiblər ki, Azərbaycan və Ermənistan hökumətləri öz toplumlarını sülhə hazırlamalıdırlar. Necə? Yenə müxalifətsiz? Hələ hansı, necə bir sülhə hazırlaşmalı olduğumuzu soruşmuram”.

Erkin Qədirli əlavə edir ki, bu və başqa problemlərin çözümünə gedən yol azad və ədalətli parlament seçkisindən keçir.