Rəsmi Moskvadan Azərbaycana ittiham
Rusiya Xarici İşlər Nazirliyinin rəsmi nümayəndəsi Mariya Zaxarova yanvarın 11-i Moskvada keçirdiyi brifinqdə Azərbaycanın əleyhinə danışıb.
Novator.az-ın məlumatına görə, Mariya Zaxarova erməni Rusiya vətəndaşlarının Azərbaycana buraxılmamasından gileylənib: “Bu tip insidentlər geridə qoyduğumuz son bayram günlərində qeydə alınıb. Əvvəllər də belə hallar olub. Biz bu məsələni Azərbaycan tərəfi qarşısında qaldırmışıq, bildirmişik ki, bu, düzgün olmayan, pis ənənəyə çevrilib”.
Mariya Zaxarova 2018-ci ildə Rusiya vətəndaşlarının etnik mənşəyinə görə Azərbaycana buraxılmaması yönündə ən azı 16 halın qeydə alındığını vurğulayıb: “Rusiya vətəndaşları aeroportda saatlarla saxlanıb, sonra zorla ölkədən çıxarılıb, bunun rəsmi səbəbi isə bildirilməyib. Bu faktlar Rusiya vətəndaşlarının haqlarının kobud surətdə pozulmasıdır. Rusiya Xarici İşlər Nazirliyi dəfələrlə belə halların qəbuledilməz olduğunu Azərbaycan tərəfinin diqqətinə çatdırıb. Biz vətəndaşları saxlamaq və ölkədən çıxarmaq təcrübəsinə son qoymağı tələb etmişik. Bu cür hallar iki ölkə arasında dostluq münasibətləri ilə bir araya sığmır. Azərbaycan rəhbərliyindən vəziyyətin düzələcəyi vədi almışıq. Buna çox ümid edirik”.
1988-ci ildə Azərbaycanın Dağlıq Qarabağ vilayətini qoparmaq üçün hərbi təcavüzə başlayan Ermənistan həmin bölgəni (Xankəndi şəhərini, Şuşa, Xocalı rayonlarını tam, Xocavənd rayonunu, keçmiş Ağdərə rayonunu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən), eləcə də Qazax rayonunun 7, Naxçıvan Muxtar Respublikasının 1 kəndini işğal edib.
