Narkotik vasitələrlə bağlı cinayətlərin statistikası açıqlanıb. Dövlət Statistika Komitəsi Daxili İşlər Nazirliyinə istinadla bildirir ki, 2018-ci ilin yanvar-iyun aylarında qeydə alınmış 12844 cinayət hadisəsinin 1813-ü və ya 14,1 faizi narkotik vasitələrin və psixotrop maddələrin qanunsuz dövriyyəsi ilə əlaqədar olub. Cinayətlərin 58,2 faizini narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma, 33,2 faizini eyni hərəkətləri satış məqsədilə etmə, habelə bu maddələri istehsal etmə, göndərmə və satma, 6,5 faizini tərkibində narkotik maddələr olan bitkiləri kultivasiya etmə, 2,1 faizini güclü təsir edən və ya zəhərli maddələrin qanunsuz dövriyyəsi ilə bağlı cinayətlər təşkil edib.

Narkotik vasitələrin və psixotrop maddələrin qanunsuz dövriyyəsi ilə bağlı cinayət törətmiş 1227 nəfərin 87,2 faizi heç yerdə işləməyən və oxumayan, 38,4 faizi əvvəllər də cinayət məsuliyyətinə cəlb edilmiş şəxslərdir. Onların 0,3 faizinin yetkinlik yaşına çatmayan, 7,3 faizinin 18-24 yaşlı, 13,3 faizinin 25-29 yaşlı gənclər, 79,1 faizinin 30 və yuxarı yaşlı şəxslər olduğu bildirilir.

6 ayda 1441,9 kiloqram narkotik maddə (674,5 kiloqram heroin, 508,8 kiloqram marixuana, 198,9 kiloqram tiryək, 44,4 kiloqram həşiş, həşiş yağı və qətranı, 15,3 kiloqram digər narkotik və güclü təsiredici vasitələr) müsadirə edilib.