Müsavatçı 7 ilədək həbsi nəzərdə tutan maddələrlə ittiham olunur
- 08 Yanvar 2018
- comments
- Novator.az
- Posted in Xəbər
Müsavat Partiyası Şirvan təşkilatının həbsdə olan sədri Əlikram Xurşidova yeni ittiham irəli sürülüb. Bu, yekun ittihamdır, belə ki, ibtidai istintaq başa çatmaq üzrədir.
Əlikram Xurşidovu ötən il noyabrın 22-də Şirvan polisi tutub. İki sutkaya yaxın polis şöbəsində saxlandıqdan sonra ona qarşı Cinayət Məcəlləsinin 221.2.2-ci və 221.3-cü maddələri ilə cinayət işi qaldırılıb. Noyabrın 24-də Şirvan Rayon Məhkəməsi Əlikram Xurşidov barəsində 3 aylıq həbs qətimkan tədbiri seçib.
Yekun ittihamda 221.3-cü maddə saxlanıb, 221.2.2-ci maddə isə cinayət işindən çıxarılıb. Eyni zamanda işə yeni maddə – Cinayət Məcəlləsinin 315.2-ci maddəsi əlavə olunub.
Novator.az Əlikram Xurşidovun vəkili Nemət Kərimliyə istinadla bildirir ki, bu, ittihamın ağırlaşdırılması deməkdir. Çünki 221.2.2-ci maddədə nəzərdə tutulan əməl (ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq törədilməsi) 2 ilədək müddətə islah işləri və ya 5 ilədək müddətə azadlıqdan məhrum etmə ilə cəzalandırılır. 315.2-ci maddədə nəzərdə tutulan əməl (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) isə 3 ildən 7 ilədək müddətə azadlıqdan məhrum etmə ilə cəzalandırılır.
221.3-cü maddədə göstərilən əməl (silahdan və ya silah qismində istifadə edilən əşyaları tətbiq etməklə xuliqanlıq törədilməsi) də 3 ildən 7 ilədək müddətə azadlıqdan məhrum etmə ilə cəzalandırılır.
Beləliklə, Əlikram Xurşidova qarşı irəli sürülən yekun ittihamda 3 ildən 7 ilədək müddətə həbsi nəzərdə tutan iki maddə (221.3-cü və 315.2-ci maddələr) yer alır.
Əlikram Xurşidov hazırda Şüvəlandakı 3 saylı istintaq təcridxanasında saxlanır.
Müdafiə tərəfi ittihamları əsassız sayır və Əlikram Xurşidovun əslində sosial şəbəkədə hakimiyyəti tənqid etdiyinə görə tutulduğunu bəyan edir.