Dekabrın 26-da Vergilər Nazirliyi əlavə dəyər vergisinə (ƏDV) 2017-ci il yanvarın 1-dən qüvvəyə minəcək dəyişikliklərlə bağlı açıqlama yayıb. Yeniliklərdən biri ödəmə qabiliyyətini itirmiş bankların qeyri-işlək aktivlərin təqdim edilməsinin 2017-ci il yanvarın 1-dən üç il müddətində ƏDV-dən azad edilməsini nəzərdə tutur. Azərbaycan prezidentinin fərman və sərəncamları ilə yaradılan icbari tibbi sığorta və səhiyyə xidmətləri göstərən qurumların gəlirləri mənfəət vergisindən müddətsiz, buğdanın idxalı və satışı, buğda ununun və çörəyin istehsalı və satışı, quş ətinin satışı üç il müddətində ƏDV-dən azad edilir.
Prezident İlham Əliyev Vergi Məcəlləsinə 200-dən çox dəyişikliyi nəzərdə tutan qanunu yenicə imzalayıb. Novator.az bildirir ki, məcəlləyə 115 yeni maddə əlavə olunub, 83 maddədə dəyişiklik edilib. Yeniliyə əsasən, bankların fiziki şəxslərin əmanəti üzrə ödədiyi illik faiz gəlirlərinin, habelə emitentin investisiya qiymətli kağızları üzrə ödədiyi dividendin və faiz gəlirlərinin gəlir vergisindən azad edilməsi müddəti beş ilə qədər artırılır. İxrac fəaliyyəti ilə məşğul olan şəxslərin apardıqları əməliyyatlardan yaranan ƏDV üzrə artıq ödənmiş vergilərin müddəti 45 gündən 20 günədək endirilir.
Məcəllədə topdan və pərakəndə ticarətlə məşğul olan vergi ödəyicilərini fərqləndirən meyarlar da müəyyən edilib.
