Suxerberq: “İnternet adamları kasıblıqdan qurtaracaq”
“Facebook” sosial şəbəkəsinin yaradıcısı Mark Suxerberq bugünlərdə BMT-nin mənzil-qərargahında keçirilən tədbirlərin birində internetin imkanlarından danışıb.
Novator.az xəbər verir ki, Suxerberq hazırda 4 milyard adamın qlobal şəbəkəyə girişinin olduğunu söyləyib. Mark Suxerberqin sözlərinə görə, inkişaf etmiş ölkələrdə internetə girişin genişlənməsi 140 milyon iş yerinin yaranmasına yardım edəcək, 160 milyon insanı kasıblıqdan çıxaracaq və 600 milyon uşağa ciddi pul xərcləmədən təhsil almaq imkanı verəcək. O deyib ki, internet – kompüter şəbəkəsindən daha böyük anlamdır: “Hazırda internet sosial-iqtisadi inkişafda aparıcı gücdür”.
Sosial şəbəkə rəhbəri bildirib ki, informasiya-kommunikasiya texnologiyaları səhiyyənin, təhsilin inkişafı, sülhün, təhlükəsizliyin təmin olunması üçün vacib amildir: “Bir milyard adam öz fikrini çatdırmaq və dəyişikliklərə nail olmaq üçün internetdən yararlanır. Biz dünya xalqlarının birliyinə onları şəbəkə ilə birləşdirməkdən başlamalıyıq”.
